漢南洞 · 首爾的「裏原宿」

離開星空圖書館之後，我喺 COEX Mall 兜咗個圈。其實如果有鍾意魚嘅朋友，應該會好想去水族館，不過我興趣不大，就費事嘥時間喇。

接出發去下一個地方 —— 漢南洞（Hannam-dong）。

由 COEX 出發，搭 2號線 去 往十里站（208），轉乘 京義中央線，喺 漢南站（Hannam Station） 落車，行 1號出口 就到。呢個地方俾我嘅感覺非常舒服，有啲似日本嘅原宿同涉谷，但更多咗一份悠閒同文青氣息。

漢南洞有好多值得慢慢行嘅牌子：

Beaker：韓國潮人必到嘅 Select Shop，集合咗好多本土同國際設計師品牌，行一圈已經可以睇晒最新潮流。

Nonfiction：簡約控至愛嘅韓系香氛品牌，包裝靚到一個點，連空氣噴霧都有人專程買返香港做手信。

Mardi Mercredi：嗰朵小雛菊 hit 到冇朋友，由金高銀帶起熱潮，韓國女仔幾乎每人有有件😍。

Heavenly Jelly：近期大熱嘅膠鞋品牌，賣點係可以 DIY 自己裝飾，將對鞋變成獨一無二。雖然我唔覺得會好舒服，但 Fashion 嘅嘢，我識條鐵咩？😆

EMIS：韓星私服常客，簡約得嚟有設計感，帽同袋都好受歡迎。

tamburins：Jennie 代言嘅護手霜品牌，包裝靚、香味特別，係好受歡迎嘅韓國手信。

仲有好多其他小店，行到攰就搵間咖啡店坐低嘆杯嘢，非常寫意。

咁啱行到一間咖啡店大排長龍，我都有啲肚餓，但又唔敢食多嘢

最終叫咗一個肉桂麵包 take away。搵到一個位坐埋一邊慢慢食，嘩⋯⋯唔怪之得咁多人排隊，真係超好味！😋

呢度嘅衫偏向高檔次，設計感強，質地又好，咁啱某啲舖頭又有 discount，如果睇啱真係好鬼正！我自己都忍唔住買咗少少嘢⋯⋯咦，咁證明我應該差唔多好返晒啦！😂

最近大熱既膠鞋... 買完自己再揀配件加上去

食完之後，腸胃完全冇唔舒服，我就知道⋯⋯我終於好返晒啦！😂🎉