正日生日，兩個多月前就訂好我最愛的Robuchon（順便八掛一下，呢間餐廳喺法國、美國、英國、日本、新加坡、大陸、台灣、香港、澳門、泰國同埋摩洛哥都有分店添㗎！我去過澳門、香港同東京，yeah🙌）
一去到，餐廳竟然留咗全場最靚嘅位置俾我哋，望住成個澳門塔，個view好好丫😍
坐低冇耐，職員即刻送上welcome food： 凍蕃茄湯，一啖飲落去，嘩，超好味！
職員推架麵包車比我地揀，吳生話成日見人攞好多但又食唔晒，我話：唔好理人啦，最緊要自己食得開心又唔浪費！😝
吳生佢嘅頭盤係煙燻蘇格蘭三文魚，俾咗少少我試，入口好清新！
頭盤我揀咗佢哋嘅招牌「la caviar」～正到冇朋友😍😍😍
主菜係法國小羊排，職員話羊仲係BB未戒奶，所以一啲臊味都冇😃我本身驚臊味唔食羊㗎，但吳生切咗一細舊俾我，咦，又真係幾好味喎☺️
餐廳知道我生日，所以送上拿破崙，超好味🤤
甜品？梗係要甜品車啦，可以揀兩款
最後再嘆杯Cappuccino，完美。
甜品吳生揀咗疏乎厘配雪葩，掂過碌蔗！
成餐飯我哋傾吓講吓，不知不覺就過咗好耐。吳生笑我又大一歲🙄喂呀，唔好成日提住人哋幾多歲啦！最緊要身體健康、心境青春，每日開開心心咁過就夠晒皮啦😂😂
