呢座紅磚建築靜靜企喺南港灣旁邊，外面望落古色古香，好似一座博物館咁。原來佢早喺1889年已經開業，由芬蘭建築大師Gustaf Nyström操刀設計，走新文藝復興風格，見證咗赫爾辛基超過一個世紀嘅變遷。當年因為市民越嚟越重視食品衛生，先決定由露天集市搬入室內，打造呢個全年不受風雪影響嘅市場空間。
一行入去，嘩！同外面嘅冰天雪地完全兩個世界❄️➡️🌞。市場內部係狹長形設計，兩邊木製攤位排列得整整齊齊，每間舖頭上面都有一盞細吊燈，招牌統一做白色，成個環境乾淨到一個點，完全冇一般市場嘅異味。呢度唔似亞洲市場嗰種喧嘩熱鬧，反而有種北歐式嘅安靜優雅，行起上嚟舒服到唔捨得走。
我成個market行咗一圈，雙眼不停食雪糕👀。魚子醬、北極魚、馴鹿肉、甚至傳說中嘅熊肉罐頭都有得賣！不過今日主角唔係罐頭，係我心血來潮嘅海鮮大挑戰！
嗌咗個龍蝦撻，面頭仲鋪左魚子醬🤯，望落成件藝術品咁，食落層次豐富👍
原本諗住飲返碗經典三文魚湯，但見到隔籬左右個個捧住龍蝦湯，個樣滿足到呢⋯⋯忍唔住跟機：「我都嚟一碗！」🦞
一飲，好味喎！ 湯頭濃郁鮮甜，不過⋯⋯龍蝦肉有啲過熟😮💨 呢度真係要扣返少少分💔。但我心諗：會唔會芬蘭人本身鍾意食全熟龍蝦㗎？🤔
揀咗間順眼嘅舖頭坐低，「一隻生蠔！」🦪 平時唔食㗎我，但嚟到芬蘭試吓無妨。結果好新鮮！ 海水鹹香夾住creamy口感，一嘢滑入喉，完全冇腥味😋
北歐物價你懂的，但用料新鮮，氣氛一流，坐喺百年歷史嘅市場入面慢慢嘆，成件事即刻升值幾倍！
食飽飽，回頭望吓呢座紅磚建築，心諗：下次我同吳生再嚟👋🇫🇮
沒有留言:
張貼留言