羅瓦涅米 ~~ 雪上電單車

對上一次玩雪上電單車，已經係10年前加拿大黃刀鎮的回憶。今次嚟到芬蘭羅瓦涅米，梗係要重溫呢種冰上飛馳既快感！

為咗唔趕頭趕命（夜晚要坐火車返赫爾辛基），我專登揀咗最早的一團。結果成團超爽，得我同一對英國女仔，變相私人團咁滯。因為揀咗接送服務，一早司機就直接嚟酒店接我，唔使自己搵路。

去到辦公室，首先要換上佢哋嘅專用外套同雪鞋。最好笑係，職員指住我件外套問：「入面著咗幾多件衫？」我：「一件咋。」佢瞪大眼：「一件？！😳」我心諗：我件外套真係好暖㗎！不過為安全同規範，最後都係乖乖換上佢哋嘅制服。

一切準備就緒，教練就車我哋去一個冬天結冰嘅大湖。開戰前，教練超細心，由開車、停車、轉彎，到手勢信號（Go、Stop、Pay Attention）全部教齊，等我哋喺後面跟車都識配合。

三架車出發：教練帶頭，英國朋友中間，我揸尾。一開始喺冰湖上風馳電掣，但我安全至上，寧願做「墊底嗰個」慢慢開。教練好好人，成日停低等我，仲主動幫我哋影相。

之後入樹林，先係平路，後嚟條路窄到啱啱好一架車。我就係呢度出事！可能太緊張扭得太勁，成架車斜咗一邊，要停喺度。好彩教練好機警，見我無端端失蹤，即刻掉頭返嚟救我，幫我扶正架車，仲溫提：「記住，彎位唔好扭咁多呀！」

玩完幾段路，教練帶我哋去一個隱世美景停低小休。

原來佢仲秘密準備咗熱辣辣的藍莓茶同曲奇餅！喺冰天雪地飲住熱茶、食住甜餅，成個人都暖晒，嗰種窩心真係難以形容。

回程後教練要趕下一場，安排咗另一位保加利亞同事車我返酒店。沿途傾咗好多，由芬蘭生活講到旅行點滴，為今日劃上完美句號。

雪上電單車，真係一種玩完會上癮嘅活動。深信總有一日，我會帶老公嚟玩丫！