今日參加咗破冰船團，真係超級興奮！早上食完早餐，喺酒店reception等司機嚟接，跟住開車去到瑞典邊境，踏上咗架polar explorer，就係咁樣展開咗我嘅破冰船之旅！
一上到船，個個都爭取有利位置，準備捕捉破冰嘅震撼一刻！當船身碾過厚厚冰層，發出卡卡嘅巨響，真係睇到嘩嘩聲🤩
之後，船停喺海中心，工作人員就分成兩組做準備。 其中一個環節就係海中暢泳！工作人員幫我哋著上俗稱「龍蝦衫」嘅保暖浮衣，著完之後成隻龍蝦咁，超搞笑🤣 雖然我本身唔識游水，但著住呢件衫真係信心爆棚，完全唔驚會浸死！
落到水一刻，手腳亂咁撥，但點郁都係喺船邊徘徊，游唔開🤣 玩到咁上下，唔知點解我突然間浮咗出去，愈撥愈遠，點撥都返唔到去船邊🫨 唯有用盡全力大叫：「Help! Help!」好彩團友們好幫手，推我一二下😅 最後工作人員出手，輕輕鬆鬆拖返我上岸🤭🤭
之後我同老公講：「我係最後一個上岸㗎！」佢初頭讚我：「叻叻喎！」但當我話其實我係游唔返去船邊⋯⋯佢就咁答：「咁樣🤭！」笑死！
換返衫之後，我即刻衝咗去玩海上漫步😄😄
海上飄浮嘅感覺真係好奇妙！
午餐時間返去餐廳，嚟到瑞典點可以唔試肉丸？所以我即刻叫咗份瑞典肉丸，算唔錯！
成日都落住雪，回程時雪愈落愈大，好彩唔大風，唔算太凍。瑞典比芬蘭快一個鐘，四點鐘已經天黑齊，回程安排得好好，玩得盡興又唔會趕，最後仲獲贈証書一張✌🏻✌🏻
今日真係玩得好開心，係一個難忘又好笑嘅體驗！
沒有留言:
張貼留言