超推薦 ~ 乳豬糯米 @ 御寶軒

為咗傳說中嘅乳豬糯米卷，今次專登帶埋老公再訪呢間酒樓！上次同同事食完一直念念不忘，今次終於可以同佢分享。

 

酒樓規定要點半份，即是最小要半隻乳豬，半份為12件，好在兩次都好幸運搵到其他客人一齊分擔，今次我哋就要咗四件 ~ 果然無令人失望！乳豬皮脆卜卜，糯米軟糯香綿，兩種口感交融真係一絕，極度推薦！

仲有鮮蝦腐皮卷，腐皮炸得金黃脆卜卜，包住鮮蝦餡料，咬落去超級滿足。

炸芋角再度encore，外層酥脆唔油膩，芋蓉綿密細滑，滲出淡淡芋頭香，真係食唔停口！

另外點咗鮮蝦腸粉，蝦肉爽口彈牙，米皮滑溜，蘸少少豉油已經好滋味。

兩個人分享四樣點心，分量剛剛好，飽足又唔會過膩。呢度嘅點心水準穩定，尤其乳豬糯米卷絕對係必試之選，下次一定會再嚟！