💇‍♀️ 變髮 · 醬油蟹 Gebang Sikdang Seongsu

 呢日嘅行程真係好充實，由朝玩到晚，完全冇浪費一分鐘！

朝頭早一早起身就去咗 Hollys Coffee 食早餐，因為腸胃炎啱啱好，仍然唔敢飲凍飲，怕啲冰唔乾淨，所以淨係嗌咗個包。不過，味道一般般，冇乜太大驚喜😥

之後即刻趕去藥房幫朋友買護膚品，自己又忍唔住買咗少少 😄 買完之後，將戰利品擺返酒店，就出發去整頭髮！😂

呢間髮型屋我喺網上搵嘅，口碑非常好，去到之後發現服務同環境都係一流！原本我想剪短佢，但髮型師話而家呢個髮型適合我，只係剪少少 layer 已經好靚。之後再做埋頭髮護理同顏色，遮住啲白頭髮 🤣 我影張相俾吳生睇，佢仲話：「嘩，有兩個人服侍你呀！」洗頭非常舒服，而且有獨立空間，雖然我個位唔係獨立房，但私隱度極高，成個過程都好 relax。

整完頭髮之後，即刻坐的士去食午餐！一早已經 book 咗位食 醬油蟹 🦀 上次我去大瓦房食，環境係傳統韓式屋，而今次呢間係米芝蓮食府，風格非常新派。坦白講，我自己覺得坐得唔係太舒服，但佢真係好爆，我只 book 到 1:30 時段，食完之後已經到打烊時間。

太初排骨 · 一個人嘅韓牛盛宴😋😋

離開漢南洞之後，我就返返明洞，因為今晚 book 咗一間好出名嘅 太初排骨（태초갈비），今餐係食韓牛！😃

之前仲好掙扎，驚腸胃炎未好返食唔到⋯⋯好彩！我已經確認自己好返晒，可以盡情享受！💪

我訂咗 7:30，但到步時尚早，就喺附近行咗一陣街。行到差唔多時間，忍唔住提早上去問吓可唔可以早啲開餐？😂

因為我一個人食，就算點散餐都必須要點兩份牛嘅份量。我揀咗佢哋 signature 嘅排骨，呢個無論如何都一定要叫！至於牛肋條同雪花牛肩肉，我揀咗後者，因為見到啲油花比較靚。

喺呢間舖頭食嘢好舒服，有專人服侍，佢會幫你燒埋，火候控制得好好。燒好之後會擺上碟，俾你可以慢慢品嚐。

我先食雪花牛肩肉，真係幾好味喎！連個粟米都好清甜。到咗主角排骨，燒好之後食第一啖，簡直不得了，係好好食嘅！😋

我一個人慢慢食、慢慢嘆，真係好滿足。

食完之後，喺明洞 shopping 行吓消化吓

呢隻好味.... 所以買點返屋企比老公食

咁啱 TIRTIR 七折，我又買咗兩盒氣墊粉餅 😄

 見到有魷魚，又買咗啲俾老公食，雖然我強烈反對佢食魷魚（因為唔健康），但既然見到，買少量俾佢啦！

本來冇諗住買護膚品，但行到一間舖頭，有位職員問我想要乜嘢，我話「睇吓先」。點知睇睇吓⋯⋯又真係有興趣想買喎！個職員好好耐性，問長問短都冇黑面，仲好詳細咁解答我問題。

期間見到一個外國人買咗非常非常多嘅嘢，職員話佢用過好之後返嚟大量採購。我半信半疑，走過去問吓佢⋯⋯原來佢係美國人，職業係醫生，佢話俾我聽買嘅護膚品全部都係自用嘅，因為之前用過覺得非常好用。

咁我梗係望吓佢買咗啲乜啦！最後我自己都買咗少少，諗住試吓先，好嘅將來先大量入貨。😆 嗰位醫生唔同，因為美國飛韓國要十幾個鐘，佢真係要一次過買夠！香港飛韓國只係 3 個鐘，而且我仲未試過同吳生一齊去韓國，我之前已經猛咁講話下次要同佢一齊去睇紅葉，到時有排時間慢慢買啦！

拎住一大袋護膚品，諗住返酒店，點知又走咗去買襪，我同老公每人三對！😂

最後拎住滿載而歸嘅戰利品，開開心心返酒店。呢日真係好圓滿！😊