岩石教堂（Temppeliaukio Church）

食飽飽喺Savoy出發，下一站：期待已久嘅岩石教堂（Temppeliaukio Church）！由餐廳行過去大約25分鐘，當散步消化一流。🚶‍♀️

講起呢座教堂，真係「禾稈冚珍珠」嘅表表者！ 你行到去，第一眼只會見到一嚿大岩石，連尖塔都冇，好似一個地堡咁毫不起眼。但一入去... 嘩！別有洞天！成個教堂係直接炸開岩石內部建造，牆身保留原始花崗岩紋理，粗糙得嚟又充滿力量！

呢度有個小故仔：其實早喺1906年，當地人已經想喺呢度起教堂，但因為附近民居唔想被高樓遮擋陽光，計劃一路拖到1961年先公開徵集設計方案。 建築師蘇奧馬萊寧兄弟諗到條絕橋：唔向上起，而係向下挖！將岩石掏空，上面加個玻璃天頂，自然光灑落嚟，成個空間即刻充滿靈性！ 1968年動工，一年後就落成，快過歐洲好多起幾百年嘅大教堂😆

行入去，抬頭望，直徑24米嘅紫銅拱頂，由180條放射狀混凝土樑支撐，樑之間鑲滿玻璃，日光透入嚟，啲影子好似鋼琴黑白鍵咁靚😍 最正係四周圍嘅岩壁，冇油畫、冇裝飾，只有原汁原味嘅花崗岩，左邊褐紅色，右邊灰黑色，連當年鑽探嘅痕跡仲留低咗！ 聖壇簡單到得一個銅製十字架，兩支白蠟燭，低調到暈，但反而更顯莊嚴。

仲有，左邊岩壁上有一架巨大管風琴，有成3001支音管！ 因為石牆粗糙，回音效果一流，成日有人嚟開音樂會。 春天溶雪時，仲會有泉水從石縫滲出，沿牆壁滴落水道，成個畫面原始到好似返咗遠古時代！ 有人話呢種設計體現咗芬蘭人嘅性格：外表平淡內斂，內裡舒適甚至奢華，唔鍾意露富。 我就話，呢度真係將「因地制宜」四個字發揮到極致！👍