**20歐買個精神爽利，抵到爛啦！**

芬蘭第一日，凌晨落機即刻仆上火車去酒店，雖然坐完十幾個鐘頭飛機，但係個人非常興奮而且沒有倦意，皆因見到成個地方都係冰天雪地💪🏻😍

去到酒店reception ，正常要下晝4點先可以 check-in，不過有個 early check-in offer：即刻俾70歐就可以上房，等到10點就20歐。

我望一望錶，朝早8點咋嘛🤔🤔

心諗：俾20歐就可以即刻有房梳洗、攤唞吓，成個人成個行程都會精神晒！抵丫，當買個精神爽利！💰

點知後面有對香港夫婦，個男人大大聲聲：「20歐都唔會俾啦！」 佢老婆即刻黑面，吚吚哦哦話其實想住另一間酒店，個男人無奈解釋：「嗰間爆咗啦嘛...」 。跟住你一句我一句，最後個男人乖乖俾咗20歐😂😂

見到呢個場面，忍唔諗返之前睇過個 Facebook post：有對夫婦為慳幾歐，要老婆喺冰天雪地拖住行李行路，結果兩個鬧大交😅

原來真係有咁多真實個案㗎！

講返自己先，出到去街頭，零下10多度真係唔係講笑，好彩著夠衫，行起上嚟都唔覺太凍。

行行吓入咗間超市，記得芬蘭藍莓汁好出名，即買一盒獎勵吓自己！😝見到啲包又好似好香咁，忍唔住買多個。

果然冇買錯！麵包好鬆軟，藍莓汁清甜到不得了，呢個早餐，100分！🥖🫐

10點準時返酒店攞行李上房，梳洗完畢，成個人重生一樣🤣🤣 跟住就出發行第一日行程。

今日金句：有時使少少錢，換返個舒舒服服嘅旅程，真係值回票價㗎！💯