赫爾辛基嘅集市廣場（Kauppatori) / 赫爾辛基大教堂

第一日嘅行程其實都係周圍行吓、感受吓。

由酒店慢慢散步到赫爾辛基嘅集市廣場（Kauppatori），呢個廣場喺港口旁邊，面對住波羅的海，海風吹嚟真係好凍😆 廣場上面有一排排橙色嘅帳篷，遠睇已經好搶眼。嚟之前做咗功課，知道赫爾辛基嘅三文魚湯好出名，但成個廣場咁多檔，真係唔知點揀。於是乎用咗最原始嘅方法，睇吓邊間最多人排隊就入去！ 除咗嗌咗一碗熱辣辣嘅三文魚湯，仲忍唔住加多條香腸。果然，群眾嘅眼光係雪亮嘅💡 個湯 creamy 得嚟又唔膩，仲要係我至愛嘅杰身質感，啖啖都係魚肉，飲完成個人都暖笠笠 😂

捧住個滿足嘅胃，就喺廣場四圍影相打卡。見到好多路人對住海港影，我見佢哋影完就膽粗粗問人幫我影張全景。不過下下要人幫手都唔係辦法，算！自己嚟先係王道！ 自拍一輪，滿意晒先捨得走人去下一個景點。

跟住嚟到今次旅程嘅重頭戲：赫爾辛基大教堂。嘩，真係「嘩」咗一聲出嚟！成座純白色嘅教堂襯住淡綠色嘅圓頂，加埋當日個天空藍到唔真實，呢三隻色撞埋一齊，靚到好似明信片一樣😝 原來呢座教堂有成170幾年歷史，仲有個朵叫「白教堂」。據講舊時啲水手出海，遠遠望到呢個綠色圓頂就知就快返到屋企，所以佢先係赫爾辛基咁 iconic 嘅地標🏛️ 我企喺教堂出面嗰排長長嘅石級度，俯瞰成個參議院廣場，真係忍唔住逗留多一陣，靜靜咁感受吓呢份寧靜同莊嚴。