自家煮 @ 葡萄牙 apartment

今次旅程比較長，所以中段book 左apartment，需要時在廚房煮下野食。

 

早餐 ~ 跟在香港整既差不多，都是沙律菜、車里茄、鷹咀豆、紅腰豆等等。 呢度既蘑菇唔貴，所以買左盒煮下意粉或加去早餐，好鬼香！

 

晚餐煮過煮豬、雞、當然仲有主打既海鮮！

 

豬：黑毛豬緊係好味，價錢有平有貴，而且選擇又多。煎前只需用少少鹽及黑胡椒，沙律菜做伴碟，見到張相就知道掂。

 

雞： 在漁市場買左雞全翼，買左當地既醬汁加黑胡椒及蒜蓉去醃，坦白講好耐冇煎過雞翼，在家都是用氣炸鍋或焗爐。 之後唔想慢慢煎，把雞翼索性剪開，原因唔駛慢慢煎同快熟，快快趣煎完就食得！ 雞肉好滑，不過雞皮好肥，我自己就唔太鐘意！

 

聖子：見到漁市場既聖子好新鮮，如在香港買聖子，街市職員會幫手劏好，在外國就冇呢支歌仔唱，貪食就要自己動手，幸好我自備刀而且刀夠鋒利，所以好快劏好。 因手上調味料有限，所以我爆香蒜蓉洋蔥再炒聖子，最後加點紅椒，令整碟食物夠香又好睇。 其實個聖子好鮮，我估亂炒都會好好味。

 

蝦&翡翠螺：呢兩樣在超市買現成，個蝦好有驚喜，我地2個超級喜歡； 翡翠螺好味不在話下，最抵死仲要好平，攪到老公成日話要買呢兩樣當晚餐。

 

青口：見到新鮮青口於是買左一pack，都係用牛油蒜蓉洋蔥去煮，我仲買左支綠酒去煮，因為酒味比較 fresh，如果有香草就更加好，不過我冇專登走去買，結果係點？緊係好好味啦.....  青口已經有海水味，什麼調味都唔駛落已經夠晒味！

 

蜆：上篇已經講左葡國既蜆係好好味，而我就一定冇可能煮到人地咁，我又係用蒜蓉去炒，當然用埋手上支綠酒，不過記緊加牛油同檸檬汁，好好味架。

 

睇完野我講既，最後結論都係一句：”好好味呀” 自己都忍唔住笑！

reference : 

#黑毛豬

#雞全翼

#聖子 #蝦 #翡翠螺 #酒炒青口 #檸檬炒蜆