美食+靚景 @ 幸匠燒

星期六去左海運幸匠燒吃午餐，假期既尖沙咀非常人多亦難於訂位，多謝朋友幫手訂位仲送左coupon 比我，由於有coupon 呢餐仲減左400大元，所以呢餐飯好抵食！邊吃邊對住維港景色，超級正！

 

估唔到星期六都會lunch set，我地2個人叫左2個餐，一個係鰻魚鴨肝 另一個係幸之盛，另再叫左雞泡魚干及九洲槍魷魚燒！老公仲叫左杯黑啤，隻杯有兩粒骰仔好得意！

 

由於係午餐所以配有沙律、湯及白飯，吃了沙律更加開胃而且有帶子，雖然薄片但好新鮮好好味。我地見到好多人都係叫鰻魚同幸之盛，果然係signature。

 

鰻魚鴨肝

鰻魚好肥美而且好juciy，再加上我喜歡既鴨肝，無得頂

 

幸之盛

有和牛串、牛舌串、雞肉長蔥燒，燒車里茄、翠玉瓜、露筍豚肉串

食物都係即食即燒，和牛同牛舌好好味，其他都是水準之上，燒完唔會好乾丫！

 

九洲槍魷魚燒

原隻魷魚燒得好好味，個醬汁無得頂，唔會硬而且口感爽彈，老公講左幾次話燒得好好！

 

雞泡魚干

呢個係我必叫，我估無難度，去任何一間吃都係咁好味！

 

 

吃飽緊係去行下街先，路過son級蛋糕，老公問我，咁似你之前整既蛋糕？ 係呀，無錯呀，就係我上星期整既芝士蛋糕，一睇個價.，哇，外面買一個6吋要538元，好貴啊！ 不過咁講，人地出名又要人工又要租金，咁緊係唔會平啦！

 

返到屋企我又即時再整一個，今次用左220度45分鐘，出爐放涼再雪好，今日即時送左比2位朋友，希望佢地鐘意我既小心意啦！

 

Basque burnt cheesecake 巴斯克芝士蛋糕

 昨日整左basque burnt cheesecake，出爐時成品係震騰騰，凍左再放入雪柜，雪完就會實返晒！

 

整芝士蛋糕，Cream chesse 一定要買隻好味既，我揀左 Luxe ，因為口碑好係信心既保証！

 

材料：

忌廉芝士350g

糖75g

雞蛋3隻

忌廉300g

雲尼拿籽隨意

低筋粉15g

Rum 10-15g

 

做法：

(1) 忌廉芝士放軟，先打散再分2-3次加入糖

(2) 雞蛋分3次加入

(3) 再加忌廉及雲尼拿籽

(4) 低筋粉過篩

(5) 加上rum 酒

(6) 焗爐預熱210度55分鐘

(7) 出爐放涼再入雪柜

St Barts @ 西貢

約左好友一齊吃飯聚下，除左食物要好味坐得要舒服外，更重要唔好限時！ 最後我地揀左位於西貢既 st. barts！

我地每人叫左一杯virgin colada 佢地blend 得好飲啊！  

食物都幾大份, 所以我地叫左2份 share 食，Tuna Tatki 我之前自己都整過，緊係在外面食下人地既味道😊 幾好味呀

見到好多人都食hamburger 我地叫左雞扒包，因為朋友唔食牛，雞都一樣好好味丫，仲有好多薯條，食下一條食下又一條... 愈食愈飽！

我地見到好多人order 青口，不過我地食唔落，呢個地方都唔錯，所以朋友話可以再encore 仲話下次都要叫青口食！

由於唔限時，我地邊食邊傾，食完再傾.... 又唔洗轉場再傾，超級好！

八號風球下 *抹茶戚風蛋糕*

估唔到八號風球維持左一段長時間，被困在屋企緊係入廚整下野食，最終我整左個抹茶味戚風蛋糕，再打埋個抹茶cream，呢個係我地既下午茶，估唔到即日掃清！

抹茶粉、我買過3款，包括五十鈴、青嵐及若竹。試過呢3款後，我依家只買五十鈴，因為色靚，有甘味，冇澀味

 

無花果合桃包

 雖然今日假期，但仍然一早起身做好家務就趕出去同朋友聚會。

差不多三點收到通知黃昏掛八號風球，於是急急趕返屋企 😖

吃完晚飯冇所事事，好啦，咁整包！

今次整左個無花果合桃包，呢個包完全冇牛油，出爐忍唔住吃完一件又一件，個皮係脆，好好味呀😝！

 

reference : 春之戀高筋粉  /  日本幼麥粉 /   無花果   /   合桃

Mont blanc 蒙布朗

法式甜品中，Mont blanc蒙布朗係我喜歡之一，因為我好鐘意食栗子，而蒙布朗材料主要是栗子為主。

蒙布朗造型是法國人依照白朗𡶶而做成，螺旋形唧上栗子蓉再曬上糖霜，就像山上堆滿積雪，形態非常美麗

自己整既栗子撻不想曬太多糖霜😆 但我覺得一樣吸引

朱古力栗子麥包

收工入屋，一邊煮飯一邊打粉，首次做朱古力栗子麥包

雖然外貌欠奉，唯有希望好味😅

麥包

好耐冇整包做早餐，收工返到屋企火速打麵團，一發二發之後焗18分鐘就有包包出爐！

老公問我，得三個？ 

係.....  試下好唔好食先，好食下次先再整雙倍份量😆

朱古力蛋糕

好耐冇整甜品喇，今晚飯後有蛋糕食丫！

睇落有小小似街買咁

 

reference : valrhona

Viteantonio 窩夫模

見到朋友仔用V機整左窩夫話好好味，諗起自己都有部V機，於是昨日去左買窩夫模！

 

我整左朱古力味，本來想包橙粒，不過麻薯配朱古力應該更好味，我試左有2個唔包餡，睇下效果會唔會相差好遠，有麻薯既真係好味好多！

其實做法相當簡單，而且出爐即吃脆卜卜，所以八件即時已經掃清

 

材料：

低粉65g

高粉 100g

可可粉15g

酵母3g

日本蛋 1隻

牛奶55g

糖30g

牛油50g

麻薯

 

做法：

(1) 所有材料 (牛油除外) 放入廚師機打成團

(2) 最後加入牛油

(3) 室溫發大一倍 (約一小時)

(4) 麵團分成8份

(5) 可包入麻薯或其它餡料

(6) V機掃油放入麵團 4分鐘

 reference :   春之戀 /   valrhona / isigny