其實我一直都好鍾意睇音樂劇，今次見《貓》嚟香港演出，點可以錯過？買飛嗰陣我仲專登逐日check ，希望買到最前最中間嘅靚位，最後真係俾我買到第三行中間位 😍
點知今日……原來我係第二行正中間呀！！！
演出期間當然要守規矩，全程唔准影相、唔准錄影。但中場有20分鐘休息，大會安排可以上台影相，我當然即刻衝去排隊啦！📸💪🏻
最驚喜嘅係，中場休息完、臨開場之前，啲貓演員會走嚟走去，喺觀眾席同大家互動、影相！我即刻嗱嗱聲拎手機影呀影，影呀影😄 仲同佢握手丫。 呢啲近距離接觸嘅時刻真係要好好留念，返到屋企慢慢回味都仲笑得出 😛🐱
講到全晚最觸動我心嘅一刻，一定係第二幕女主角唱《Memory》嘅時候。呢首歌正正係成個劇嘅情感最高峰，嗰陣Grizabella已經經歷咗被排斥、孤獨同滄桑，再次唱出對往日美好嘅回憶，歌聲入面嗰種渴望被接納嘅情感，完全唔係聽入耳，而係直達心坎、穿透靈魂😭 全場靜到得返佢把聲，每個音符都好似敲喺心上，真係起晒雞皮🌙
今晚真係開心到震，完場嗰陣，老公已經喺會場等我接我返屋企。成程車我完全停唔到口，喋喋不休咁捉住佢講晒全晚有幾正、有幾感動 🤣 雖然佢話自己唔鍾意睇歌劇，叫我唔使買飛俾佢費事嘥錢，但佢依然願意嚟接我、仲聽我講足全程😏❤️
講開音樂劇，其實我前後睇過 《The Phantom of the Opera》、《Les Misérables》同《CATS》，三套都係經典中嘅經典。但若然要講最最最鍾意，一定係 《The Phantom of the Opera》 ，所以我已經前後睇咗四次咁多！兩次喺香港、一次倫敦、一次紐約，每一次都睇到我起雞皮，每一次都覺得有新感動。如果將來再有機會，我肯定會毫不猶豫衝去睇第五次！🎭❤️
今日，一個人都好幸福。 因為鍾意嘅嘢，從來唔需要人陪先值得去做。🐱🎶💫
沒有留言:
張貼留言