閃電泡芙

呢個新年好難唔肥！

一來呆坐家中，而最大件事就係日焗夜焗，日整夜整.... 日食夜食 @@ 暈！

屋企得我同老公兩個人，唔係我食就係佢食，莫講話想瘦，唔肥已經偷笑！

 

到底新年整左乜？ 其中一個係閃電泡芙。個名咁得意？ 閃電泡芙？原來係法國人認為太美味，一出爐就即時比人吃光，吃的速度如閃電般快，個名來源就係咁！

 

整泡芙唔難，只要先煮好古士餡，再準備好泡芙皮，焗完之後在底部刺三個小孔後唧入吉士餡，雪凍吃超級美味！

福菜

 雖然今個新年取消晒所有團拜親友聚會等等，不過都非常忙碌。

因為要負責早午晚三餐，亦想趁假期烘焙一下，所以忙到飛起！

今日確診三百幾，創了疫情以來新高，真係好恐怖

依家要日煮夜煮，有時諗要煮乜都幾頭痛，今日午餐來個大堆頭，一碟攪掂！

虎年大吉

先同大家拜個年

祝各位虎年行大運，身體健康，事事順利

大年初一當然要食自己整既蘿蔔糕啦！

另外要多謝街坊同舊同事送上年糕比我，好好味！

送牛迎虎

煮個麻辣雞煲結束牛年最後一個晚餐日

仲有幾小時就準備迎接老虎年！

希望老虎年事事順利

年28 收爐喇

今個整左一大盤蘿蔔糕比自己，老公話我地新年都唔會去拜年，整大盤底每日早餐吃下，下午又吃下，好快就吃光啦！

虎年大吉大利！

蘿蔔糕

星期一就到新年，一如以往又要開工整蘿蔔糕，第一轉先做三斤，等明天再做最後一轉就可以收爐😁

蘿蔔 1800g  (已刨皮)

臘腸 5條

日本元貝 50g

蝦米 80g

粘米粉 240g

鷹栗粉 120g

水 720ml

鹽 10.5g

糖 5g

胡椒粉

做法：

 

(1)   乾瑤柱及蝦米用水浸，水留用。

(2)   用中火蒸臘腸五分鐘 (可出油, optional) 或用熱水略沖洗

(3)   乾瑤柱、蝦米及臘腸切粒備用

(4)   蘿蔔刨絲備用。

(5)   熱鍋後落油爆香乾瑤柱、蝦米及臘腸

(6)   蘿蔔絲 + 水用中細火煮至軟身(約15-20分鐘左右)

(7)   粘米粉+鷹栗粉過篩後，將 720ml 水混在一起拌勻及加上鹽、糖、胡椒粉 (攪至沒有粉粒)

(8)  蘿蔔絲 + 已拌好粉水 + 已爆香的乾瑤柱、蝦米及臘腸炒好

(9) 已炒好蘿蔔放入蒸盤

(11)   Miele 100度蒸60分鐘

 

*蒸完用竹籤吉去蘿蔔糕，沒有粉即成，否則再蒸*

生日快樂

 今日係老公生日，送上我的小小心意！

希望你日日都咁開心、最緊要身體健康！

快餐

有些朋友會問我返完工仲晚晚煮？ 係架，大多數都係食快餐！

但快餐都可以好味、 健康、豐富

芥蘭 / 魚 /  鵪鶉髀仔

芥蘭：用烚，水滾落2-3滴油及少少鹽

魚：用氣炸，曬點鹽及黑椒200度7分鐘

鵪鶉髀仔：用氣炸，曬點鹽及黑椒180度14分鐘之後200度1分鐘

晚餐就係咁簡單

 

香草焗法國春雞

六點後冇堂食，我一向都唔鐘意外賣，加上自己平時都會煮，咁當然自己煮啦！

返完全日工身心好疲累，晚餐會以簡單為主！

呢個香草焗春雞係我最近很喜歡既其中一味。

食材：

法國春雞一隻

香草適量

鹽及黑椒

台灣麥芽膏

做法：

(1) 春雞洗乾淨用廚紙印乾

(2) 塗上鹽、黑椒及香草醃一日

(3) 預熱焗爐180度35分鐘，取出掃上麥芽膏再200度10分鐘

外面好多麥芽糖或麥芽膏係死甜既味道，呢隻好有驚喜，佢係清甜而不太甜.... 岩晒不愛甜既我！多謝朋友送上優質食材

鑽石曲奇

今日整左伯爵鑽石曲奇

點解個名有鑽石？因為曲奇邊位會沾上砂糖！

當吃入口時曲奇酥脆又有點香甜，我相信大人及小朋友都會喜歡！

味道很個人，我自己很喜歡伯爵茶，所以呢個曲奇整左伯爵味道，其實下次可以整朱古力；綠茶；檸檬；紅莓等等