The Local by Oamthong @ BANGKOK

                                晚餐我哋去咗 The Local by Oamthong。

先講講呢間餐廳嘅來頭：佢連續多年獲得米芝蓮必比登推介，主打「懷舊泰國菜」，專門復刻失傳嘅宮廷食譜同埋家庭式老味道。餐廳本身係一棟過百年歷史嘅殖民風格大宅，環境充滿古典泰式優雅，聽講好多菜式都係由拉瑪五世時代流傳落嚟，食嘅唔止係味道，仲有歷史。

由於唔係太肚餓，我哋一開始先嗌兩樣嘢食，諗住唔夠再叫。

一直等到呢一餐😁 我哋叫咗黃咖喱炒蟹同海鱸魚，兩樣都係餐廳嘅 Signature 招牌菜。

黃咖喱炒蟹一上枱，我已經覺得怪怪哋：「咦，點解唔香嘅？」

食第一啖，鹹咗少少；再食多兩啖，越食越唔對路，真係鹹喎☹️

我問吳生覺得點，佢話：「一般啦。」我問會唔會今日師傅重手咗？平日應該唔係咁？ 但我哋兩個不約而同話，真係唔得。

作為一間米芝蓮餐廳，我叫嘅仲要係招牌菜，有乜理由我自己煮嘅黃咖喱炒蟹仲好味過佢？ 😪😪

魚就 OK，唔差😋

甜品叫咗椰子雪糕芒果糯米飯，總算係一個安慰😝

食到尾聲嘅時候，隔籬枱嚟咗三個香港後生仔，聽到佢哋話想試黃咖喱炒蟹，我哋即刻提佢：「好鹹㗎，小心。」

啱啱好職員行過嚟問我哋食物質素如何，我好坦白咁講：「黃咖喱炒蟹唔夠香，蟹肉偏鹹。」職員好緊張，即刻入廚房同大廚講。

到我哋走嘅時候，三個香港後生仔特登同我哋講：「好在有你哋反映，我哋隻蟹 OK 呀，正常返！」 

我哋嘅結論係：呢一餐真係失望，最慘係嘥咗我哋quota😖😖

唔會推介，以後亦都唔會再嚟。