茄子釀蝦膠

 二人晚餐：茄子釀蝦膠 / 煎牛小排 / 烚菜芯苗

茄子切好加少少生粉才放蝦膠在上面

我用氣炸鍋180度12分鐘，之後再加上現成燒汁

又好味又簡單

~貓爪~

 原來我仲有好多蛋糕模買左仲未剪綵

所以要努力用下，唔想有任何浪費

岩岩出爐喇... 係唔係好得意呢！😍

抹茶戚風

 昨晚整好的戚風，老公拎返公司，他的回應是蛋糕太細而同事太多，佢自己都冇食而留比同事試下！

 

今晚我又再整戚風，味道係抹茶！以往我一直用雙手去甩模，而今次我試用刀.... 我覺得用刀出來效果唔靚 >__< !!  唔計外觀，其實都係好味好軟綿綿，切件之後再包裝好，今次到我分比某某試味！

 

原味戚風蛋糕

今日收工趕回屋企快快煮晚餐，因為要睇奧運！

在螢光幕睇住張家朗拎左金牌，過程睇得好緊張，恭喜再恭喜，為香港爭取光榮！

之後我就整戚風，今次都係整原味.... 甩模之後包好就同老公講，你拎返公司請同事食啦！ 佢好驚訝問... 下... 原來比我架？

屋企得2個人，唔係你就係我，我只係鐘意整下... 你的同事有口福啦！

 

香辣菜甫

 同事買左幾條蘿蔔乾比我，我用佢整左香辣菜甫！

其實我從來冇食過菜甫，之前有朋友送左一樽比我，見到老公都鐘意食，所以今次自己試下整！

我既材料有蒜泥、乾蔥、蝦干、乾瑤柱、指天椒及蘿蔔乾！

我見好多人用櫻花蝦或者蝦米，而我早兩星期去流浮山食海鮮時買了一些蝦干，所以用佢黎煮！至於乾瑤柱就係自己喜歡所以加左一點！

 

健康早餐 / 九層塔炒花甲

 比大家睇下我今日既早餐，又靚又健康！

晚餐一般都會煮二至三個餸，其中一樣一定是菜！

今晚入門口見到花甲同我打招呼，老公話見到幾靚而我地已經好耐冇食過，於是買左一斤！咁我用九層塔去炒，又香又鮮甜！

 

材料：

花甲

蒜頭

乾蔥

九層塔

指天椒

頭抽

老抽

 

做法：

(1) 花甲先吐沙

(2) 爆香蒜片及乾蔥再加入花甲

(3) 加九層塔及指天椒

(4) 最後加入調味

 

焙茶戚風蛋糕

 今日買了日本蛋及焙茶，主要用來整戚風蛋糕！

我用10cm及14cm模焗出一大一細蛋糕，好順利甩模，而且好靚啊！ Yeah ~😆

即是包好一個送左比人啊✌

橘子瑪德蓮

 又是瑪德蓮啊！

 

為什麼又是瑪德蓮？主要見到老公同事很欣賞，大家還問在那間店買！

就是這樣，給我動力再作嘗試。

今晚出爐是橘子味道，我同老公都覺得好吃，他還急不及待說明天拿回公司，看來下次要多焗一點！

 

Madeleines ~ 瑪德蓮蛋糕

 昨日除了整左 Tuna Tataki 外，我仲整左 Madeleines！

早上先打好蛋糊後就放入雪柜，因為整瑪德蓮蛋糊最少要雪幾小時，晚上吃完飯後就入爐，見到蛋糕慢慢升起，有肚臍啊，好靚呀 ^^ 

出爐前已經聞到香噴噴，我同老公試食滿意後

餘下的蛋糕我就包裝好等老公請同事吃，他表示同事都很欣賞我的蛋糕仔。

Tuna Tataki

一直都好想整Tuna Tataki，只係一直未買吞拿魚，今日假期終於可以整喇，其實呢味菜又簡單又好味，最重要老公未食過，因為我係第一次煮，大家都覺得有新鮮感😂！