下午茶時間 ~ 波菜雞肉批

我都幾鐘意食批，成日在外面買黎食，倒不如自己學下整啦！

週末假期，飲杯茶食件批😋

東方素

有同事是素食者，所以同佢吃飯必須要揀素，幸好灣仔都幾多選擇，佢揀左間叫東方素，主因由公司行過去唔算好遠，網上評價唔錯而且性價比高

 

招牌蜜絲骨

呢個係用猴頭菇炸，再加上酸甜醬汁，好味好開胃

茄子豆腐煲

好惹味，唔錯啊

脆鱔

唔係卜卜脆，同食開某間好大分別，但呢碟好重菇味，愈食愈好味

腰果合桃露

呢個甜品失色左小小，唔夠香同甜左少少

整體算唔錯，下次可以再encore ~

紫薯酸種包

好耐冇分享食物相片，其實我一直頻密焗蛋糕及麵包，試用不同方法及不同口味去練習，完全無愉懶！

 

回想當初下決心去學酸種包，最大原因是成品好靚。一個靚字，吸引我一直不停學習、不停實習！

 

今個假期我除左實習上堂麵包外，亦膽粗粗運用平時學回來知識再研究新口味，最後用紫薯做了一個酸種包，雖然仍有很多進步空間，但自學算是合格有餘，而且很有滿足感。

 

抹茶栗子包

 收工返到屋企第一時間打粉，因為明天早餐冇著落 >__<

 

有栗子蓉未開，所以試下整抹茶栗子包，我用五十鈴抹茶粉，栗子蓉係冇甜味，所以自己調教，另外加左少少rum 酒就再香啲。

 

出爐忍唔住食左半個，好好味啊

 

紫薯月餅 / 朱古力月餅 / 奶黃月餅

今日同朋友一齊整月餅，我地3個人整左3個味道：紫薯、朱古力、奶黃！

其實我好鐘意同朋友一齊烘焙，當中可以分享心得，獲益良多。

朋友仲整左斑蘭戚風蛋糕，又有拉花咖啡，更有芒果西米露，好正好正！

今日整完....  攪到我又想再整多少少請朋友食

 

喜之次一夜干

屋企樓下間 stay hungry 見到喜之次做緊特價 $151.80 呢個價好抵食

喜之次有日本紅寶石之稱，除有大量維生素A可預防感，亦有促進維生素E吸收。

魚肉質幼嫩，含有豐富膠原蛋白，非常好味😋

我用最簡易方法烹調，將魚清洗抹乾，預熱焗爐200度12分鐘😝

Mash午餐盒

灣仔返工揾食難，一到午飯時間食市門口企滿人，所以早前我都嘗試自己帶 lunch box ，我唔想拎玻璃盒因為重，所以我帶沙律為主，咁唔需要入微波爐。

立秋後加上落雨，唔想次次自己午餐凍冰冰，見到呢個盒又輕又靚，仲可以入微波爐，更重要係要made in Japan  😍😍

老公睇見話咁細？一定唔夠飽🙄🙄 其實都唔細，個飯盒仲有兩層😄 底層可以放飯，上層仲有一格可以放餸！我覺得係夠飽的，最後我烚多一隻雞蛋，咁就一定夠晒😂

同事見到仲話似煲仔飯😁😁

米芝蓮懷舊點心@大圍小館

今日去左大圍飲茶

揀左間米芝蓮懷舊點心中菜館

呢間長期人山人海

一來得獎，二來價錢親民

我地兩個食左六樣野

蜂巢炸芋角好好味，好鬆又唔咸

脆皮松子仁叉燒包係老公揀，佢話平時外面都好少見到有呢款

懷舊魚翅餃 ~ 小時候外婆必叫呢款點心，我已經好耐冇食過，真係好好味，有大大隻蝦同好爽既木耳

懷舊煎糯米雞 ~ 第一次食煎既糯米雞，外面酒樓都係蒸，我地都覺得得意又好味

黃沙豬潤腸粉 ~ 老公話小時候有豬潤腸粉，係咩? 我記得一直都係食牛肉呀，蝦呀.... 呢個豬潤腸粉好好味，仲有薑蓉架

懷舊淮山雞扎 ~ 我平時唔鐘意呢款，因為好肥好油，但呢個就完全冇呢種感覺，難怪點心紙寫住推介

大部份都係懷舊嘢😄😄 其實仲有好多都好想食，可惜灌湯餃已經賣晒，加上兩口子亦都食唔落咁多！

食過就明白點解會人山人海😋😋

蕃茄豬肋骨

 買左一包豬肋條，今次用蕃茄去煮，因為蕃茄好味而且茄紅素又有抗氧化功效等等

 

材料：

豬肋骨1包

蕃茄3個

洋蔥1個

甘荀1支

糖/鹽適量

 

做法：

(1) 豬肋骨用鹽/糖/胡椒粉/醬油略醃

(2) 豬肋骨用2邊煎至啡黃色

(3) 加入洋蔥炒一陣

(4) 加入蕃茄(一大半)及甘荀，加入糖及鹽後上蓋煮20分鐘左右

(5) 加入餘下蕃茄再煮一陣，自行試味

奶黃月餅

原來我消失左一段時間，雖然我冇出任何煮食帖，不過我無偷懶架。

下月中秋節，趁昨日有時間試整十幾個奶黃月餅，出爐即時吃了半個，真係又脆又好味。

另外朋友已相約28號柴娃娃一齊焗月餅，每人負責一個味道，我仲未決定乜野味道，奶黃？芝麻？咖啡？朱古力？斑蘭？ 太多心了... 不過我唔整流心，因為驚功力唔夠，花了時間心機都唔流，一於取易不取難😂！